'wayahna'

wayahna dunungan didieu urang

di karangkeng

ulah kingkin

mun urang nyangsaya kena wisaya sorot mata buringas rahwana

nu

merong sintawati linggih di taman kaputren.

jep ulah balilihan

mun jahayang teu katedunan

'pan urang geus paheut pasini

seja masrahkeun keun rasa nu liar

ka kukupu,ka bangbara jeung

ka manuk manuk anu pating alabreung di luar teu reureuh

muteuran kuwung-kuwung mumunggang

kahayang urang nu lir kuda lepas ti gedogan

Wayahna

urang kedah tigin kana jangji

nu wening

ulah janten rengat galih ulah dunungan

ulah ngaraheutan manah salira

mun rasa liwar sesah di kadalina

da

bongan lain kumbakarna

nu dumuk

nyerekem na jero dada urang.

bdg.

'cariosna'

eunteung
rék ngeunteung pikeun eunteung

keukeuh nikreuh teu ka onggét ku geureuh
teu sapuk

eunteung
tetep
ngeunteung,

keur anteung ngeunteung
ungah ingeuh
teu eungeuh ditakon nu dieunteung

ih, ari eunteung nu keur ngeunteung
tempat ngeunteung

pieunteungeun paranti kumaha pakumaha
nu bakal dikumaha

jeung kudu daek ngumahakeun
kumaha.

bdg.

'mangprung'

Keun baé rék béak gunung ditugar
dikeruk.

Laut ditawu diperes tepi
korédas.

Moal jadi pikir ieu,

sabodo

nu penting mah asal kahayang cumpon

nu démplon bisa karungkup
kusarung.


Keun baé arék norék

sabodo rek disebut hirup ngablu teu puguh alang
ujur na ge.

Moal ieu digugu

laku mo mulang ka mistina

da geus pasti éta sirik nu siga pasir pasir bulistir
pada merong
Lukisan huma keur sumedeng panén

percis ucing ucing kumetap ngajeueung
lauk asin
na jero toples.

bdg

'lagu liwung'

angin ngaratu
limbung
liwar
bibilasan
ngeuret pucuk pucuk kembang harepan.
nu atra kumelip bentang timur
                                                      
midang ditiap pasang panon nu fitrah
jeung
imut rekah bulan mabra
 
nembangkeun rumpaka silung 
saparat
gurat dampal leungeun na tiap-
 
tiap keteg parapatan 
jeung
pasimpangan jalan...
bdg.

'Saur saha'

Saur

saha ka angin-angin

ruhayna burahay

seuneuna beureum ngabebela matak keueung

ngarerab kahadean nu ambalayah 

kawas pangpung sakilat ludes

ka angin-angin

 hangit rasa bayengyang hihiliwiran!

                                                         ties k '97

'maca sajak'

maca sajak nu imut miang muru
gelenyu Salira

méga nu ramijud
dumadak reueuk peuteung 

ngalungsar na cehcer kilat pating gurilap

rasa kirik 

kawas diteukteuk buntut 

babaung meulah langit 

nyasar

kecap demi kecap sajak nu imut miang muru
gelenyu pangkonan Salira.Jungjunan!

ties k.porib '95.

'damar jangkung'

:keur diri.

Damar Jangkung
nu naplok na tihang tepas kuring
hibar nyaangan jalan pangliwatan


"Haturnuhun...
nanging Salira teu katingal
:Saur Anjeun mani halimpu"
ngageuleunyu Manis ka kuring.

ties k.'11.