Urang tepang luhur méga
silih kait imut
sareng ngusapan warna kulawu
Sapertos kukupu silih udag
muteran mangpirang kembang warna-warni nu mangkak di patamanan
atanapi
Sapertos jaulna japati nu mébérkeun bodas jangjangna
ngaprak mega urang nu simpe, tresna!
=== ===
: Keur R
ti tutuwuhan pakarangan;
salambar daun buah ngémploh
leupas
ngalayang
muntang ka angin
hayang anteng
ucang-anggé dina méga
ngaguar cékasna tresna
jeung
anu miang teunangan
anu hilap
henteu heula nunda kila-kila
basa
gelenyuna
gesut muru ngambah nagri, Impian!
=== ===
balébat
:keur enin!
basa,
can tuntas ngoréhkeun rasa.
paneuteup gé,
can mernah nemukeun euntreup.
tapi naha,
salira énggal cengkat mungkas?
ngalih linggih
dina jangjang gupay.
muteran tineung, Nalimbeng!
=== ===
Di tepas karang tineung
naha raray haté masih helas, apan antara tos di pupus?
teu kedah tunda talatah,
oge néang lolongkrang nu rembet rasa hariwang yén urang bakal paturay!
; saur anjeun anu lilir ti pajuaran sanubari,
basa rasa katambias galindeng sora turaés nu mapag musim katiga!
Karang Katineung '85
=== ===
Tidak ada komentar:
Posting Komentar